昨日港股借住美股高收個勢炒上，差唔多追番晒前日嘅跌幅，但係個別股份前日跌得好傷，梗係唔可以回復前日嘅光輝，不過，港股前日跌咗落嚟之後，上升嘅氣勢已被打窒，技術上只係好番啲，班淡友隨時又會大舉出擊，今日期指結算，個市唔會平靜，相信會出現大幅上升或大幅下跌嘅局面，呢期睇嚟，仲係淡友個勢好啲。
恒指昨日裂口高開，以17478開出，期指仲開到17490，高過昨日推介嗰隻恒指P輪9761嘅止蝕位，大家應該冇行動，但係如果恒指跌番落17400樓下，9761可以再諗。
中電信C輪4981：隻中電信（728）先嗰排喺條50日線上面浮吓浮吓，成交靜到發慌，上個禮拜突然靜靜雞推高，唔經唔覺，昨日已升至2.79元，條10日線仲追緊上嚟，支持股價推高，股價升破咗2.81元就會向3元嗰頭推上，破埋3元就不得了。中電信C輪4981昨日收25.5仙，仲有兩個月期，槓桿率10.9倍（有效8.3倍），對沖值0.76，引伸波幅29.2%，正股升上3元，4981應該會喺42仙樓上，升幅超過6成。呢個價買番啲，睇實正股條20日線，跌穿呢條線，沽出止蝕。
4981仲有隻兄弟輪4982，都炒得好活躍，壽命長啲，仲有105日先到期，槓桿率23.5倍（有效10.8倍），昨日收11.9仙，正股升上3元，4982應該唔會低過22仙，鍾意刺激啲，可以揀呢隻。
俊樺