陶喆日前俾台灣周刊踢爆佢戀上當地名模白歆惠，仲見埋家長。據報料者講，當晚陶喆偕雙親去到台北嘅「橘色涮涮鍋」打邊爐，坐低唔夠20分鐘，白歆惠出現，大家高高興興坐埋一枱打邊爐，陶喆更全程用深情目光望實女友。
行騷露點上位
台灣名模白歆惠被喻為林志玲勁敵，其實佢爸爸係台灣著名監製白國嘉，佢本人就係近期炙手可熱嘅模特兒，仲試過行騷露點。去年底先有傳媒影到佢同蕭亞軒嘅緋聞男友兼台灣籃球員毛加恩結伴夜遊，𠵱家半路殺出個音樂才子陶喆，關係錯綜複雜。
自從戀情被揭發之後，白歆惠只透過經理人話當日「巧遇」陶喆，大家只屬工作上嘅好朋友，陶喆嘅爸爸陶大偉話覺得冇化妝嘅白歆惠都幾OK，不過就補充話細路仔嘅感情事佢從來唔理；至於白國嘉就話年輕人交朋友好正常，一切都言之過早咁話。
