盤髻賀國慶1支針撐晒

盤髻賀國慶1支針撐晒

時近國慶加中秋，又要睇煙花又要玩燈籠，真係大把節目，出席晚間活動當然要扮靚靚無失禮啦！雖然曲髮係秋冬大熱，但要去隆重晚宴只會略嫌casual，去玩燈籠同蠟燭又有燒着頭髮嘅危險，所以不如學會盤個靚靚髮髻，咁既精神又可顯高貴格調。
記者：陳穎欣
攝影：楊錦文
Hairstylist：Zap@ChinG
Make-up：Phyllis
Model：AlicePang@Starzpeople
服裝提供：上海灘

靈蛇教授盤髻法

髮髻於中國已有長久歷史，古時女子出嫁，會由母親為女兒梳起髮髻，象徵出嫁的意思。宮中后妃亦喜歡梳高髻，以顯示尊貴；而奴婢宮女則只能梳像羊角般的雙髻。盤高髻方法複雜，無人合作難以梳成，相傳魏文帝甄皇后髮髻式樣一日一換，花樣百出，據說她每日都見一條口含赤珠的綠蛇，綠蛇以蜷盤傳授梳髻方法，所以她的髮髻就可以每日更新，稱為靈蛇髻。

■《羅馬假期》中柯德莉夏萍的髮髻造型，為她奠定了永遠高貴美麗的形象。

低難度：2分鐘髮簪髻

大部份人對髮簪的印象都只屬古裝片內所用的暗器，但其實它真正的功用係方便盤髻。或者好多人都想知1支針咁嘅物體可以點hold得住成個髻，竅門就在於穿插髮簪的位置，必須先穿過髮髻，然後牢牢插近頭皮的頭髮。

步驟Steps

1.先把頭髮扭成1條粗辮，然後盤好髮髻。

2.將髮簪向上穿，至簪尖觸及頭皮。

3.將髮簪尖轉向下，並緊插於頭髮中。

Alice：「原來真係咁易用，見佢得1支針仲以為好難，點知5分鐘就學曉。」

中難度：5分鐘高髻

見到好多外國名模通常都喜歡盤高髻，鍾愛其簡單有型，成個人仲會顯得神采飛揚！要盤出這種髮髻其實十分容易，只需1條橡筋加數隻髮夾便可。想再醒神啲，可以加多1至2條橡筋，把馬尾抬高，感覺更精神。

■高髻既清爽亦易盤，是不少鬼妹的至愛髮型。

步驟Steps

1.先束馬尾，再將頭髮分左右兩部份。

2.將其中一邊頭髮捲向馬尾底部，另一邊同時向上捲，就像風車葉轉動一樣，然後用髮夾固定。以尖尾梳挑出髮絲造成鬆散效果。

Alice：「這個髻唔難盤，用15分鐘已經學得七七八八喇！」

高難度：30分鐘大鬆髻

這個大鬆髻適合出席隆重宴會，貪其高貴又跳脫，尤其最受年輕女藝人愛戴。梳這髮髻最大難處在於要用尖尾梳挑出心水造型，仲要削得鬆散。要再增加女人味，可像Alice一樣垂下幾絲髮鬢，感覺更溫柔高雅。

■鬆鬆大髮髻係近期荷李活女星的至愛。

步驟Steps

1.先將全部頭髮削鬆，並分左前、左後、右前、右後4部份。

2.將左後頭髮向後尾枕往內捲成一大筒形，以髮夾固定邊緣位。右後亦以同樣方法捲起。

3.把前部份和後方過短的髮絲以Upin固定於髮髻上。以尖尾梳挑出理想形態和幾撮髮鬢，以spray定型。

Alice：「這個大髮髻幾難整，尤其要hold實左右兩圈頭髮，仲要挑個靚形。」

超級難度：45分鐘擯辮高髻

這個擯辮高髻難度極高，擯辮和扭髻技術缺一不可，而且還需要相當耐性，所以效果自然是最靚。盤這髻要注意三手辮嘅髮界一定要夠直夠sharp，兼不能鬆散，以免破壞整體有型又高貴的形象。

■連JessicaSimpson同OlsenTwins都激撐擯辮髮髻。

步驟Steps

1.將外圍頭髮分成5部份，分別將每部份頭髮貼着頭皮擯出5條三手辮。

2.將內圍中心頭頂頭髮逐小撮捲圈，用髮夾固定於頭頂。辮子亦同樣捲圈後以髮夾固定於頭頂。最後噴spray定型。

Alice：「個髻好靚，但我試咗半個鐘都做唔到，睇嚟要返屋企練習。」