以前左丁山好興勸告下一輩做事要睇長線，唔好為今日之高人工而左轉右轉。呢啲係自己嘅痛苦經驗，所以現在成日叫新畢業生唔好輕言轉工。有樣辦你睇，滙豐鄭海泉，東亞彭玉榮，國泰陳南祿，恒生柯清輝，花旗陳子政等人，幾時有轉過工吖，都係三十年忠心耿耿嘅。
但係投資銀行實在太好搵，年薪百萬元視若等閒，政府D8首長級人工去到月薪十八萬元左右，ibank中人未夠三十歲已經話少唔少啲，所以有世姪輩加入ibank，唔肯做AO或滙豐trainee，無謂勸阻。呢日碰到一位銀行經濟師，已有碩士及CFA資格，問佢以前做邊份工，佢話：「做政府。」點解唔做呢？經濟師話：「我哋喺二十一世紀加入政府，福利少啲，長俸欠奉，簽三年合約冇安全感，所以全無歸屬感，一個合約之後，立即鬆人，銀行有得博吖嘛！」唔怪得肥仔Ｋ喺外國讀書，碰到幾個博士生都係辭咗AO份工嘅。
短期搵真銀唔敢話唔好，但係少年得志（志者，年尾有六十個月花紅也），慎防他日跌入地獄之時，心理不平衡。二○○○年有dot.com熱潮，投資Ｙ之公子自外國返嚟，適逢其會，加入一間所謂科技公司做ChiefArchitect（注意，並非起樓嘅建築師），收到唔少認股權，公司後來上市，Ｙ公子身家暴漲至三千萬，便以為大地在佢腳下。唉，科網泡沫好快就爆破，Ｙ公子手上股票，禁售期未過，已經成為牆紙，於是個心散晒，至今仍然未曾完全復原，打工就睇唔上二三萬銀一個月嘅人工，不願屈就，投資Ｙ唯有教佢買賣股票，幫自己睇盤。
一畢業就搵高出平均薪水幾倍嘅人工，恭喜晒，不過請留後路，有三手準備，喺好景嗰幾年，當做伊索寓言中之螞蟻，唔好在夏天扮草蜢淨係掛住唱歌，冬天一至，求助無門。想當年，左丁山畢業後搵到第一份工，薪水高過考入政府做AO，威風過一陣，𠵱家咪靠三腳貓寫稿功夫，捱吓世界！