影音試團：首創TimeMachineTV　最啱電視迷　即錄即睇

好多人試過當睇緊電視、睇到興高采烈、緊張非常之時，就被人叫去洗碗、聽電話之類。對於一眾電視迷來講就最無癮，又覺得走開一陣而開錄影機非常麻煩，LG前晚就搞咗個發布會，公布TimeMachineTV，內置即時錄影功能，操作簡單方便，一個掣即可錄影，以後去洗碗都唔怕錯失重要鏡頭，可以歎住睇電視！
記者：許福合
攝影：楊錦文

一按即錄內置80GB硬碟

聽過上面介紹，可能有人覺得「加部錄影機咪一樣！」錄影機的確具備錄影功能，不過步驟就繁複得多，而TimeMachineTV最特別之處，係具備一按即錄功能。配合類似DVD錄影機嘅TimeShift，當用家正在過電視癮之時，有要事要走開一陣，就可將電視錄低，返嚟就可以立即重播，而毋須特別設定，TimeShift錄影時間可以長達1小時，斷估各位洗碗都唔使成粒鐘啩，絕對唔驚Miss咗重要劇情！除咗暫錄TimeShift功能，TimeMachineTV其實亦可算係電視同硬碟錄影機結合，內置有80GB硬碟，有齊晒一般錄影機錄影同預校錄影功能，最長可錄到33小時，畫面水準更係達DVD水準，真係連錄影機都可以退役慳番。

$21,999（42"LCDTV）
$16,999（37"LCDTV）
售價未定（42"Plasma）

■預校錄影同一般錄影機設定差唔多，唔難上手。

■介面同一般硬碟錄影機好相似，亦有埋預覽畫面睇。

■當啓動TimeShift功能時，畫面會見到一條時間Bar。

只DemoLCDTV

TimeMachineTV可以話係LG首創嘅玩法，將會應用喺旗下嘅LCDTV同Plasma上，不過現場就只係Demo咗42"LCDTV，從外形所見，加入TimeMachineTV後並無令到體形變大，一啲都唔覺多咗錄影功能，42"LCDTV已具備HD高清支援及HDMI輸入。配合全新XDEngine，最明顯係改善黑位同層次感，現場就示範咗多段影片，除咗具備一般人對LCDTV印象，畫面特別細膩銳利，色彩同層次感都相當唔錯，殘影控制亦算理想，畫面內甚少看到有鬆散嘅情況，可見技術有明顯進步。當轉換成電腦輸入，字體望落同一般電腦芒差唔多，畫面穩定，整體望落幾舒服。