香港啲流動電話公司，喺舊年陸續推出3G服務後，經營成本即刻大咗好多。不單止基本投資多咗，仲要使好多錢，做宣傳同推廣，搞到間間有做3G嘅電訊公司，舊年啲業績都大跌。好似數碼通咁，截至今年6月底嘅財政年度，純利就少咗接近八成，賺得嗰七千萬。
間公司成績麻麻，啲老細自然要減人工啦。所以數碼通嘅一哥同二哥都要減薪。一哥行政總裁黎大鈞，今年人工連花紅只有1076.5萬，比舊年1224.1萬少咗十二個巴仙；二哥執行董事陳啓龍，今年人工連花紅則達376.8萬，比舊年382.8萬都減少咗一點五個巴仙。
年頭，電盈又加入市場推出免費試用3G，𠵱家又平到月費98元就可以用3G，若果業績同人工掛鈎，睇嚟佢哋今年薪酬調整真喺凍過水。