新鴻基地產今個月中搶咗塊青龍頭奀豬地，中原測量師行好似得到大啓示咁，寫咗篇市場評析，主要帶出𠵱家大發展商因為有好多渠道攞地，無興趣去勾地㗎喇，中小型發展商無地，先至會被迫去勾地嘅啫，所以，估計未來都係一啲中小型地皮會被勾。
但問題係，佢哋咁做，好多時係為大發展商作嫁衣裳。因為細地唔代表大發展商唔會去投噃，好似青龍頭咁，咪有新地同信和呢啲大孖沙嚟爭。
蘭西都認為大發展商其實都有啲無賴，呢啲地仔，對佢哋嚟講，就算高價投到蝕咗，都係一億幾千萬，相對每年數十甚至上百億嘅賣樓收入，簡直九牛一毛啦，但係細發展商就輸唔起，即使唔使輸身家，都分分鐘重傷。