呢幾日來，孫柏文都有用隻金手指，為大家篤個生意概念。呢個概念就係因伊拉克人嘅工資、購買力不斷上升，而伊拉克人嘅生活環境睇來應該「有壓力」，應該會食好多煙，所以大家可以考慮出口平價打火機去伊拉克。不過，因平價打火機係千篇一律嘅商品，所以好難維護市場佔有率，大家一定要喺設計上幫啲打火機去增值valueadd。
噚日孫柏文為大家提供嘅設計，可以將一個普通嘅平價打火機增值，變成一個可以一路點煙，一路焚燒各國國旗、徽號嘅「Protestinapocket袋裝示威器」產品（見圖），絕對可以迎合伊拉克人嘅口味。
突圍？冇咁易！
點知，個設計一出街，就有好個朋友即刻打電話畀我，話可以將設計再增值。朋友A話，可以學惠普HP、新力Sony同吉列Gillette，賣打印機、playstation同剃鬚器一樣，補貼用戶買打火機，跟住就高價賣易燃國旗、徽號去搵錢。起初，我聽落都有道理，點知我同朋友B講呢個收費模式時，佢話：「唔得㗎，啲易燃國旗咁容易翻版，翻版一多，你就會發現你只會賣被補貼打火機。好似新力咁，佢哋都要向翻版現實低頭，增加playstation3機售價。」所以，都唔好話要係千篇一律嘅商品市場突圍搵錢，好容易。
講起要係千篇一律、冇乜分別嘅商品市場突圍，孫柏文今日見到有一間公司，原本可以成功突圍，不過因為「冇膽」，臨門一腳撻Q。呢間公司就係售賣「冇乜分別」T恤嘅F.C.K.。佢哋前日宣布，因有太多「社會人士」批評，所以將所有印咗「Ihatemyselfandiwanttodie（我討厭自己，我想死）」嘅T恤回收。原本有啲On9、膠、唔cool嘅「社會人士」批評你嘅產品「不負責任」，就應該係對F.C.K.targetdemographics（目標消費者群）最好、最有效嘅宣傳。
乜話？使命感？
如果F.C.K.可以「企硬」，叫啲「社會人士」死開，繼續賣「我想死」T恤，孫柏文可以保證，喺「玩弄fuck字」服裝概念市場裏面，F.C.K認第二，FrenchConnectionUnitedKingdom（F.C.U.K）都唔敢認第一。不過，T恤經已回收，F.C.K已成功建立「膠」嘅形象，該品牌一世都會做F.C.U.K嘅契細佬。
最後，我想用隻金手指去篤爆理工大學紡織及製衣學系副教授吳文正嘅偽善，佢話設計師應要對社會有責任：「時裝還時裝，應有使命感。唔應該叫人食煙、叫人自殺，呢方面係冇例外。」乜話？使命感？唔通吳教授有向每年成千上萬個，因為想模仿時裝模特兒嘅瘦弱，而患有厭食症嘅女孩子道歉？