富豪酒店（078）5月頭由0.79元高位跌到6月中最低0.54元，經過一個半月整固後，8月彈上0.65元後又再整固，今個月由0.70元回落以來，已經連續4個交易日測試0.63元支持，噚日收報0.64元，微升1仙，高位上咗車嘅散戶，現正進退兩難。
喺「香港討論區」內，網友Wingsuen大呻：「0.7入咗78……cut唔cut好呢？但這兩天又跌唔落去！真煩，每天跌你一格，死未？」天上星認為：「6毫樓下就即管炒番轉。」jim7則建議：「坐一陣先啦，就嚟返埋岸。」
今個月有3間大行出報告評論富豪，3間一致睇好，其中滙證最樂觀，目標價定喺1蚊。里昂同道亨則分別睇0.86元同0.75元，呢兩間行睇好嘅理由都係來自REIT，若集團成功分拆酒店資產以REIT形式上市，股價與資產淨值的折讓可望收窄，同時令集團由高負債變為淨現金狀況，集資所得亦可支持其北京大型發展項目所需。
技術上，富豪短期如守穩0.63元，首個目標睇0.73元，如跌破0.60元先行止蝕。
余文