TCL多媒體04年收購法國湯姆遜旗下虧損嘅電視業務後，曾經一度彈升至全球電視機銷量榜嘅榜首位置。不過，隨着市場變化，今年第二季又回落至第三名。首兩名都係南韓品牌，可見南韓嘅影響力真係好犀利。
根據研究機構iSuppli統計，韓國LG電子同三星電子，喺今年第二季已經超越TCL多媒體，成為全球最大嘅兩家電視銷售企業。
資料顯示，LG電子第二季佔全球電視機出貨量十一個巴仙份額，高於第一季嘅9.7%，原因係受惠於佢強大嘅薄型電視產品陣容。
至於三星電子，喺同一季內嘅電視市場份額，亦由首季嘅8.6%上升至十個巴仙。
內地嘅TCL多媒體，則由首季首位嘅市場佔有率11.2%，回落至次季嘅九個巴仙，原因係隨着內地新年假期結束，佢喺內地市場出貨放緩。去年第四季，佢亦都曾經跌出榜首位置。