陳慧琳（Kelly)前晚出席無綫節目錄影時，自爆經常磨牙，故要戴牙套睡覺，卻因而引致流口水，每次醒來，枕頭通常濕了一片。她還透露曾跟竹野內豐拍接吻戲時，遭對方傳染病菌，害她喉嚨發痛。
陳慧琳、徐淑敏及袁彌明等前晚在將軍澳電視廣播城錄影《愛牙天使護齒好開始》，內容透過玩遊戲講述愛護牙齒的重要。Kelly表示自己曾有整牙經驗，試過杜牙根，還自爆睡覺時有磨牙習慣，所以醫生建議她戴牙套睡覺，這樣可避免牙齒磨蝕，可是這會引致流口水，因此每次醒來時，整個枕頭會濕了一大片。
男友牙夠靚
問Kelly男朋友Alex的牙齒是否整齊美觀，她即大讚他的牙齒又潔白又整齊，她笑說：「佢啲牙又白又齊，又冇箍牙，天生就係咁靚。」至於欣賞男性會否先從牙齒着眼呢？Kelly稱：「唔會，都係會睇樣嘅，不過有煙屎牙就一定扣分。」
提到拍接吻戲的難忘經驗，Kelly表示當年跟竹野內豐拍電影《冷靜與熱情之間》的接吻戲時，遭對方傳染病菌。她說：「同佢拍kiss戲，拍完佢至話自己有病，叫我用漱口水漱口。當時喺荒山野嶺，佢又唔早講，kiss完至講，又冇漱口水，又冇牙膏同牙刷，之後仲要搭飛機去第二度，結果搞到我喉嚨痛，要休息一個下午至好番啲。」
此外，徐淑敏自言曾患牙周病，問她看男性是否先看牙齒，她說：「眼神交流重要啲，如果啲牙有啲唔靚，咪用微笑搭夠囉。」徐淑敏透露稍後獲派主持一個節目，她笑指同事立刻叫她多讀報紙練習發音。
採訪：卓美娟
攝影：陳偉權
