作為一個小市民，買樓多數都係為安居樂業，若果日後自住嘅單位賣樓時有得賺，對一般小市民嚟講，已經好開心。世紀21魏仕良話，剛啱錄得兩單將軍澳串燒成交，兩個賣家都有得賺，皆大歡喜。
第一宗係將軍澳廣場2座高層619呎單位，03年（「沙士」嗰年）7月買入價146萬，早兩日以192萬賣出，賺46萬，升幅32%；賺咗錢，當然開心，轉個頭就以300萬，承接咗將軍澳中心5座高層908呎單位。呢個單位嘅原業主都係03年入市，當時樓價係214.3萬，轉手賺85.7萬，升幅更高達40%。
魏經理話兩個單位都算筍價，因為係高層戶中低層價，賣平咗都有三、四成水位賺，戥佢哋高興。