現時全港擁有超過25年歷史嘅商戶，只佔總數嘅5%，其中超過40年歷史嘅，更加買少見少。
噚日就有一間踏入40歲生日，就係新創建旗下物業管理公司──富城集團。富城特登喺會展搞咗個40周年慶典，邀請一班管理層、員工同埋業主立案法團代表出席。
員工行catwalk
整個典禮最特別嘅，莫過於搵咗40位員工，着住自己套制服，上台表演fashionshow，一邊行catwalk，一邊將全公司不同部門嘅制服showoff。完場時，仲有少少煙火效果㖭，夠晒噱頭。不過，成晚氣氛都靠晒表演嘉賓陳潔靈嚟帶動，仲話，如果每戶送隻CD，就要送成18萬隻，如果賣晒出去，就會賣到三白金㖭。
同姓三分親
不過，唔知點解，新創建集團行政總裁陳錦靈成晚都冇出過聲，連致辭都只係由富城創辦人梁志堅同董事總經理鄭錦華搞掂，唔通佢同陳潔靈同姓三分親，乜都交晒畀佢做？不單止由陳潔靈搞起氣氛，連講笑𠱁堅叔都做埋，見到梁生笑唔停口，臨完場前仲唱多隻PhantomoftheOpera助興，就知近乎同名嘅陳潔靈請得過啦！