無錯你喜歡打邊爐，不過你是否心急一族？有理無理把所有火鍋料放入湯底一鑊熟，待水滾即撈起吃？須知各種火鍋料都有不同的最佳烹煮時間，如當造的吊桶，太生不能吃，太熟會變韌，秘訣是淥15秒吊桶，要四上四落，15秒時間內反覆浸灼4次，時間就剛剛好。
記者︰方綺君
攝影︰譚盈傑
模特兒︰Algie
吃火鍋湯底一定要滾
「金總統火鍋」的牛肉固然出名，海鮮亦出色，老闆Peter說︰「花蝦、鱲魚、多寶魚、象拔蚌呢啲火鍋料，我一定揀最靚嘅嚟入貨，不過數呢期最當造嘅海鮮，一定係吊桶仔（即魷魚仔）。」中醫說魷魚有滋陰養胃、補虛潤膚功效，如果食用得宜，魷魚絕對是種有豐富營養的食物，無論湯灼熟食或薄切刺身，兩者不同口感味道同樣吸引。至於牛肉，Peter說：「我試過好多牛肉，始終覺得山東黃牛嘅肉質同口感最數一數二，因為當地嘅空氣同草原都係上佳養牛嘅地方。」
開火鍋店，Peter一定對火鍋料的烹調時間好有研究，我是個火鍋迷，有時和朋友吃火鍋，水未滾就太心急一次過放太多火鍋料入鍋，等得水滾，好多火鍋料已經熟過頭，不好吃，請Peter教路，他說︰「係呀，牛肉煮太耐會變韌，海鮮煮太耐入面啲纖維會死晒，入口就唔夠彈牙。」那應該怎樣灼牛肉與吊桶？「水一定要滾，等湯底標晒煙先好落料，吊桶呢，四上四落浸入湯底，15秒食得；肥牛呢，仲快，水滾灼3至4下就得。」各位火鍋迷，記得Peter的醒目貼士喇。
解說
十五個吊桶──七上八落。這裏的吊桶非魷魚仔，是打井水用的水桶，七加八等於十五，正好形容十五個吊桶同時打水的情形。這句歇後語形容人忐忑不安，遇煩惱下不了決定，如水桶般七上八落，惶惶然不知所措。
吊桶仔 $28
9至10月是吊桶仔當造期，原隻魷魚仔呈粉紅色，因為新鮮，簡單蘸混醬或黑醋已吃得出鮮味，記着湯灼時要四上四落，15秒後一定放入口，那就最爽脆易咬。
手切肥牛 $88
山東黃牛肉，牛肉油花均勻，煮熟後口感特別鬆化，入口那股香濃牛味，非那些每碟十元八塊任點任吃的雪藏美國特級肥牛肉可比。
雪花牛肉柳 $88
同樣是山東黃牛，牛柳粒取自牛隻的「不見天位」，即牛肋骨中間的肉，所以味道比肥牛還要濃。不過因為肉厚，要放入水滾湯底灼3分鐘才全熟，灼過的牛肉出味，湯底也變得鮮甜無比。
牛骨煲 細$70 大$120
獨家首創，原來不只豬骨煲，牛骨煲也非常香濃。Peter說︰「如果鍾意食牛，食呢個煲就最啱，因為入面有牛雜、牛鞭、牛腩、牛肚……」牛骨煲熬上6至7小時，捧上枱已聞到香味。
花雕走地滑雞煲 半隻$80 全隻$160
用20年花雕酒和醃足兩小時的雞熬湯底，雞是2斤重的走地雞，肉質鮮嫩夠大隻，熬出來的湯水很重酒味和藥材味，開始秋涼，來一煲滋補養顏。
羊腩件 $58
羊腩來自山東黑草羊，用煮清湯腩的方法燜煮至腍身，再放入火鍋煮熟，有香噴噴的羊羶味，連皮入口，沒誇張，彈牙滑溜得以為自己正在吃啫喱。
食客有Say
搵食攻略
金總統火鍋牛肉專門店（24067729）
地址︰荃灣三坡坊24號地下
營業時間︰6:00pm-2:00am
座位︰150個
交通：荃灣地鐵站出千色店，往德華公園過對面馬路至鹽田街