虔誠特首權權成日話要強政勵治，係咪做到，真係見仁見智，但如果佢去問下吳光正檔九倉電訊，華華夠膽講，個答案一定係NONONO囉！
IP電話又一例
九記個財務及行政VP莫畏文，噚日講咗單網絡IP電話「案例」畀華華知──話說佢哋6月嗰陣收咗個客仔（即係服務營辦商），於是就要走去同其他固網商，搞網絡接駁（即係互連），但8號仔話，電訊管理局局長份聲明係無法律效力，除非局長下指令，佢哋先會做。咁九記惟有同電管局投訴，而10次之後，個答案都係你哋自己拆掂佢啦，難為個客仔，惟有畀完一年牌費之後開唔到檔，𠵱家經已亁坐咗四個月……真係無陰功！
咁OFTA點講呢？都係話個機制一向鼓勵營辦商，透過商業協商拆掂數，搞唔掂先搵佢哋，但今次有句新意啲嘅──𠵱家會根據最新情況而考慮介入，真係恭喜莫生！咁份局長聲明又點解冇法律效力，發言人只重申係一份guideline，大家做嘢嗰陣一定要跟咁囉！至於8號仔點講，咪秉承大藍籌最正規/正常嘅做法唔亂噏──nocomment囉！
如此強政勵治
咁九記咁多年來，響不同嘅issue成日輸畀8號仔，曾幾何時，有冇覺得OFTA偏幫對家呢？莫生話，總之明白人哋都有商業決定，只係覺得，唔知係咪文浩仔（即係MH）預備退休，不問塵世事；做得嘢嘅小慧，又調咗去廣播道，令曾經拎過最佳監管機構獎嘅OFTA變成軟皮蛇，乜都唔想做又卸膊，就連撐人都慳番……你話呢啲算唔算強政勵治呢？