呢排唔知點解，頭頭碰着黑，老細失驚無神叫我公幹，打亂晒我嘅旅遊部署；同啲friend呻吓，佢哋仲笑我，叫我睇吓運程書。唔係呀，仲有幾個月先豬年，邊有咁快，點知行過報攤，就見玄學家麥玲玲嘅豬年運程書。
我即刻call佢問吓點解咁快出，玲玲姐話係趕住喺十一國慶黃金周前出書，因內地客鍾意買運程書「送禮自用」。仲有，08年屬盲年，唔少新人急於在07年豬年拉埋，佢哋好想快啲睇吓有咩結婚好日子。
分簡體字同繁體版
玲玲姐又講，佢哋運程書分為簡體字版同繁體版，但係簡體版嘅封面係深紅色，同繁體字版嘅粉紅不同。因為舊年試過有人買錯簡體字版，畀人鬧。
另一個玄學家蘇民峰亦搶閘出書，老編阿May揚言，本書會比坊間嘅全面，財經、社會及個人運程都會講到。
我都唔理邊個打邊個，咁出年嘅運程係點，有冇人講畀我知？玄學家鄺偉雄講，豬年整體運勢「麻麻」，經濟可能會回落，又較多傳染病，好彩有驚無險。佢又話出年有利領導人，政治較穩定。
逄周一至周四刊出