樓市谷極都谷唔起，所以近排嘅新盤唔敢吊高嚟賣，定價有時甚至比二手樓重吸引，搶走唔少二手市場嘅客。馬鞍山好快又有新盤出，利嘉閣高級區域經理徐子豪話，有位投資者就係驚發展商會低價開盤，推冧個市，寧願劈價15%出貨，提早換馬。
賣出嘅單位係沙田中心A座低層D室，面積467方呎，一直用嚟收租，本來租金回報都有9厘，相當唔錯，但佢因為擔心鄰區新盤推出之後，個單位會變得愈嚟愈唔值錢，所以把心一橫，一於大減價，以117萬元售出，呎價只係2505蚊，比市價足足低15%。
不過，徐子豪同蘭茜講，呢位仁兄雖然咁劈法，但依然唔使輸錢，事關佢嘅單位係喺03年6月「沙士」期間，以撈底價73萬元買入，𠵱家轉手，重有44萬蚊落袋。