張敬軒噚日自爆新歌《餘震》嘅MV送檢後遭禁播，噚日佢去新城接受訪問時話：「我估係其中一個鏡頭，有個大隻佬打我塊面，或者太過真實，令人覺得暴力啩。」佢話MV裏面仲有兩個大隻佬嘅胸肌大特寫，其中一個仲透點，但係咪因為咁而遭禁播，佢都話一頭霧水：「香港嘅言論同接受能力都比好多國家開放，呢個MV又唔係意識不良。」張敬軒仲話個MV會執少少，希望可以重出生天。