唔好以為淨係男人先玩改車，㗎妹玩改車一樣唔輸蝕，好似《VIPSTYLE》就請咗幾個豪房女車主，個個都玩改車，仲講吓佢哋點樣將架豐田Celsior、凌志GS430、豐田Majesta大改特改，最勁係個車廂都鬼咁豪，車頭三個彩芒，軚盤Logo鑲鑽，搞到成車珠光寶氣，你可能會話佢哋幼稚，但睇落起碼比男人改裝車Fresh啲，都咪話女人幫番女人，我就覺得女人改車一樣咁有Taste。
車王姣改藍白櫳
成本書梗係唔會淨係講女人改車，揭後啲，你就會見到幾個終極改車王出現，最爆嗰位仁兄叫菅野教介，玩VIP車10年，佢將架豐田Majesta個車廂改到藍白Colortone，男人之家，咁鬼姣，但又鬼咁搶眼喎。除佢之外，仲有其他改車王一樣不相伯仲，另外可以睇埋後半Part個改裝車大集會花絮，有意學佢哋轉玩改裝VIP車者，不妨買本參考一下。
記者：黃婉冰
攝影：林栢鈞