買樓為求安居，所以置業者最忌就係買到凶宅，一則怕唔吉利，二則擔心影響物業估價。
網民Jenny214，近日便在《Unwantsforum》有關物業地產的討論區上，向網友請教如何防範購入凶宅。她說︰「很怕買了死過人的單位，地產經紀說的話是最信不過的！」
此語一出，即惹來kennyx的回應︰「你話地產經紀信唔過，咁我都唔應該answer你，其實唔係所有地產經紀都係唔好嘅。你可以問banker，如果做到mortgage嘅樓即係應該冇問題，banker一定知道。」
他續稱︰「因為你去估價時，估到價就應該冇問題。點解經紀唔同你講有冇死過人，因為佢哋都唔知，冇得check，我哋最多都係睇番個search，如果有就會寫喺度，冇就冇寫，但銀行會知得更多。」
地產經紀未必知
另一名網友crazylionpc認為︰「基本上除咗屋內發生過命案，否則係唔會有紀錄。上個月發生咗單空中飛人（跳樓），自己單位跳落樓下死，死者係業主，銀行一樣借到錢，冇問題。」
clseee就教Jenny214︰「如果個經紀呃你，你第日可循民事告佢！」
不過，asianrambo卻反問︰「你說可告他呃買方，但事實上，他呃了你甚麼？他呃了你這單位沒鬼嗎？你是買方，如何證明你的單位是因為死了人而鬧鬼？鬼是否存在是很難證明的..唉」
在18個回應當中，以MaPPy0092頭腦最清醒，他安撫大家說︰「鬼神之說，老實講，我好鍾意聽同睇。但係閣下咁迷都應該知道唔一定個個都見到㗎，吓話！媽咪都有教啦，平生不作虧心事，夜半敲門也不驚嘛。」
報料電郵：[email protected]