香港地華洋共處，中西文化互相交流，好似香港嘅「炒樓」文化，就成功灌輸咗畀本地老外，認真有趣。以中環SOHO區為例，最近就有一宗外籍炒家，短揸2個月執到40萬嘅成交個案，簡直恨死隔籬。
聽利嘉閣區域經理吳鳳萍講，帶挈老外賺錢嘅單位係中環士丹頓街同些利街交界嘅嘉彩閣低層，面積520方呎，連300呎平台，成交價325萬元，呎價6250，造價合理。
蘭西八到，老外今年7月用285萬入市，原先佢都估唔到咁快會賣得出，所以諗住放吓租，點知財神揀中佢，結果揸2個月就賺咗40萬。至於接貨嘅買家，原來亦係外籍人士，佢買嚟係諗住收租，以市值租金萬八蚊計，回報率有6.6厘，都幾筍。
吳鳳萍話，SOHO區一直好得老外歡心，無他嘅，無論自住、返工或者去威都夠晒方便；如果買嚟投資，呢區就好值租，平均呎租有30至35蚊，所以喺買家入市比例當中，有超過三成係外國人，包括澳洲、英國同印度等。
電郵地址：[email protected]