《美女廚房》除咗踢爆一眾女星的「高超」廚藝外，仲先後爆出咗五位食物：粥、粉、麵、飯加糖水。聽住佢哋嬌嗲嘅「係～」、「嘩～」聲咁出場同介紹食物，固然過癮，但現實中，佢哋又鍾唔鍾意「食自己」呢？今次找來扮演阿飯的孫慧雪講吓，點知佢話：「我超鍾意食飯！仲鍾意用串燒送飯！」
記者：蘇振鵬 攝影：楊錦文
一口氣食兩碗飯
平時睇《美女廚房》，粥、粉、麵、飯幾個都着住套超性感的侍應衫，個個身材都好GoodFit，諗住又係「唔會點食」嘅瘦身主義者，澱粉質、煎炸食物絕口不沾，點知身為阿飯竟最愛「自己」：「我真係好鍾意食飯㗎！每次都要食兩碗，出街食飯又要叫加大，甚至病時無胃口，我都要食飯。除咗飯，我仲鍾意食薯仔、麵包等，總之凡係澱粉質食物我都鍾意食。」嘩！果然係飯桶一名。不過專家話食得太多澱粉質食物，可能令血糖上升，甚至引起連鎖反應，導致心臟病或糖尿病，阿雪你都要小心喎。
食物焚化爐最愛串燒
咁其他食物又點？「其實我係乜都鍾意食，我班Friend叫我做焚化爐㗎！但我又食極都唔肥喎！哈哈！」結果佢提議嚟匠日本料理：「我鍾意呢度有齊各樣刺身、壽司、串燒等各式日本料理，尤其係串燒，燒得好香好好味，仲有差唔多成60款畀我揀，我最鍾意一邊食串燒，一邊食壽司，有飯又有餸，咁至開心。」唔怪得一見到整串燒嘅廚房就要貢入去啦！
負責人楊經理話：「我哋盡量提供多啲唔同種類嘅菜式畀客人，每種食物都有專人負責，好似壽司刺身就有兩個日本師傅打躉，整串燒有獨立廚房，我哋就係唔想分薄咗啲師傅，咁樣先可以確保食物嘅質素。」態度正確！唔怪得呢度唔只清一色提供日本料理，仲有吧枱畀人飲酒啦！
「好味呀！好味呀！」每次食到好嘢，阿雪就會好自然咁講爆出嚟，雖然冇《美女廚房》咁嬌滴滴，但一樣咁搞笑。查實有冇嘢佢係唔食嘅呢？「芫荽！我好怕芫荽陣味㗎！」哦，原來食物焚化爐都有嘢驚嘅。
糖醋豚角煮$60
豚角煮即將豬肉厚切成方形，厚厚一嚿。坊間一般會用東坡肉的方法烹調，但呢度用上糖醋來煮，還要燜大半日令豬肉又腍又入味。而肉和脂肪分布比例極均勻，入口酸甜得嚟帶甘香。
雜錦魚生飯$90
魚生用上蝦、海膽、吞拿魚等，大大件絕不馬虎。阿雪：「魚生好大件好新鮮，將嚿飯整成兩個飯糰咁好得意，睇見都開心。」
明太子牛油炒雜菌$68
阿雪：「雜菌有雞髀菇、金菇、冬菇等，好有咬勁呀！加咗明太子炒就更加惹味，又有少少辣味，鍾意食菇嘅人一定鍾意。」
初秋套餐（二人份量）$160
全個套餐有前菜、沙律、炸雞、炸甜蝦，還有當日的精選壽司（共10件）和刺身（共5款），包埋兩杯啤酒，都唔使$200，豐富又抵食！不過呢個套餐供應時間只限6pm至8pm，試完後阿雪最鍾意炸雞和炸甜蝦，夠鮮又唔油膩，真係好正！
海鮮沙律蘑菇$58
將自製的海鮮沙律釀入蘑菇燒成，面層帶燶，入口脆卜卜，阿雪：「蘑菇好香好多汁，海鮮沙律燒得十分惹味，口感豐富。」
食客有say
搵食攻略
匠日本料理（23693939）
地址：尖沙嘴堪富利士道8號格蘭中心地下G04-05號舖
營業時間：星期一至日12:00nn至3:00pm、6:00pm至12:00mn
座位：100個
人均消費：午餐$60、晚餐$200
最好賣：串燒、刺身
