瀚宇博德噚日開始公開招股，原先計劃周一開記招，結果押後到噚日。保薦人寶來資本總經理王齊元解釋，因為周一剛收到港交所批准，修改上市日期，由10月9日提前三日至10月6日。
點解無端端要提前呢？佢話，呢個係應公司同埋投資者嘅要求，趁市旺，希望盡快上市。而且，揀10月6日，亦特別有意義，因為當日係中秋。華華估計，10月6日係星期五，之前一日退票可以攞番錢，即係炒瀚宇只須畀六日息，但如果跟原定日子，雖然lock住啲錢只係多一日，但由於星期六係假期，星期一先可以動用啲錢，入大飛嘅投資者梗係唔想啦。
另外，瀚宇董事長焦佑衡發言時亦好風趣，佢話，香港記者比起台灣記者，沒有想像中咁「兇」；而呢十年，佢喺香港接觸到最大變化，係本港記者嘅國語愈講愈好。