宏利金融（945）今年5月頭炒股份拆細，最高升到290元，高過美加宏利股價逾10%，炒到過晒龍，結果喺唔夠兩個月內跌到241.20元，跟住打橫行。
大市呢3個月係咁升，但宏利近兩個月喺9蚊波幅內拉鋸，唔少捧場客呻到樹葉都落埋。隻股噚日忽然逆市向上爆，收市報254.80元，升3.40元，又再惹起散戶憧憬。
喺「香港討論區」內，網友投資王畀意見：「此刻相信是宏利上車的最後機會，相信要開車。」
宏利大粉絲fc_king話：「但願如此！我大半貨係宏利……前排一路橫行我一路睇機會吸，𠵱家都冇乜錢可以再吸了……等佢升。」bodybutter大呼好彩：「太好了，早兩日呢隻野死死吓嗰陣仲諗住放咗佢，好彩冇放。」
宏利係優質金融股，2000年頭股價由40蚊（以拆細計）樓下起步，靠優秀業績吸引投資者追捧。
集團近年積極發展中國大陸市場，雖然暫時只係佔集團整體業務好小部份，但相信再過幾年，內地業務會好有睇頭，揸呢隻股要有耐性，博到時重估價值，會好和味。短線如果升穿258元，可挑戰274元。
余文