政府一直希望由吉叔黃應士領導嘅公共廣播服務檢討委員會，可以喺今年底交到報告，點知一向硬頸嘅吉叔8月出席立法會，被人問到幾時交功課時，勞勞嘈嘈咁話「我唔想人哋催我哋幾時完就幾時完，𠵱家唔係要出報紙吖嘛」，搞到政府內部都打定輸數。不過，吉叔講就咁講啫，但內心不知幾聽政府話。聽聞佢已經取消晒今年底所有外遊活動，目的係咩？咪就係要趕住提交報告，希望局方都有貨交，唔使成日俾人話佢哋採取拖字訣，睇唔出吉叔都咁體貼喎。
講開吉叔，佢今日會公布三個工作小組初步結論，星期五又會出席港台新一輯節目宣傳活動，到時大家可以親自問吓佢，趕工係咪趕得好辛苦喇。