上海突然爆咗單貪污案出嚟，涉案者係「上海一哥」陳良宇，話同社保基金嘅錢被挪用有關係，你話啲投資者唔驚就假，國內嘅股市下跌不在話下，而喺佢哋好遠以外嘅港股亦無法置身事外，恒指昨日畀啲淡友係咁質，埋單唔見咗237點。
睇吓報紙啲專家分析，個個都話唔止貪污事件咁簡單，仲係權鬥嘅政治事件，講出嚟嘅都係大條道理，都幾有可能。貪污事件對股市嘅影響唔會好大，但係政治事件就好難捉摸，睇嚟啲投資者都會觀望吓先，咁嘅情況，淡友會有較大優勢。不過，即月期指明日結算，恒指喺呢個水位，好淡雙方仍然會有惡鬥。
恒指P輪9761：恒指昨日「穿頭破腳」低收，上面由「3頂突破」變成「3頂不破」嘅假突破走勢，短時間內要掉頭炒上破關嘅機會已大大降低，雖然恒指𠵱家企喺條20日線，但係大市氣氛已轉淡，加上期指結算，恒指呢兩日再跌嘅機會好大，50日線會受考驗，有可能略為跌穿50日線先至會反彈，由𠵱家個位計，仲可能有兩三百點跌幅，可以吼吓隻恒指P輪9761，昨日收13.8仙，槓桿率27.9倍（有效12倍），引伸波幅18.2%，對沖值-0.428，街貨約22%，恒指下試17100，9761料會升至16仙，恒指下試17000關，9761料上試17仙，到時是否沽出獲利，視乎大市的沽壓及技術走勢，恒指重上17450止蝕。
俊樺