時間即是金錢，對於有心賣樓的業主，將空置單位鑰匙交給地產代理，既可免除等客上門，客人又睇得方便，增加賣出機會，但經紀良莠不齊，究竟是否信得過，業主交低鑰匙，便可一勞永逸嗎？
針無兩頭利，網友believeme係《香港討論區》提出，「你哋放盤會擺低鑰匙畀地產公司予人睇樓嗎？」，以及想了解交低鑰匙的利弊。
網友ck138說，「畀低鑰匙方便很多，唔使成日上去開門，一日可能睇幾次樓，煩都煩死……」
小心變示範單位
的確，代理帶客睇「匙盤」最快捷，幾時睇都得，而且任睇唔嬲。網友5544CPM直言，「你擺低鑰匙，就預咗畀人當示範單位！」另一位網友fwho更說：「變示範單位就一定，仲可能付出昂貴電費，記得我有一次係8月朝早睇樓，一入到屋，點解咁涼嘅？原來全屋冷氣開晒，我個經紀講，梗係噚日有人睇完樓，無熄冷氣就走啦！你話，分分鐘要交成千蚊電費1個月……」
以上問題防不勝防，可以做嘅唔多，網友tommythumb提出幾項建議，「可以放匙係管理處，叫地產代理有客去問管理員攞；如果間屋有鐵閘同木門，只留一條匙予代理，自己可以鎖晒兩度門，隨時封盤；又或者叫經紀睇樓前，通知業主，得閒上去check吓，有無手尾！」
記者問過地產代理，佢哋話，很多時帶客睇盤一次睇幾個，但係管理處通常只登記1個單位，若然其他單位出現無閂窗，無熄燈及開冷氣，也未必涉及最後登記者，故向最後登記者投訴，往往出現口同鼻拗情況，難以追究。
此外，大行經紀眾多，未必每個於睇盤取匙前，喺公司電腦做紀錄，失匙情況經常發生。經紀又話，若干管理處願意協助業主，保存單位鑰匙予代理睇樓，就可顯示真實出入紀錄，有問題也易翻查追究。
經紀直言，「交低鑰匙畀代理，純粹係方便自己，並非意味單位容易賣出，能否賣出？主要視乎樓價係咪筍。」
報料電郵：[email protected]