港人鍾意買樓，亦喜歡「隔山買牛」，但山高皇帝遠，買外國樓一定要一眼關七，事事小心。
最近福布斯就出咗越洋買樓10式，等蘭西同大家分享一下。買外國物業首先要請番個當地嘅律師，咁就包無甩拖。仲要留意稅制、產業擁有權條例、物業規劃發展條例同埋買賣過程嘅相關條例，事關有啲地方，可能只需要一封簡單嘅信件就可以完成交易，到時矇查查以為自己未簽約，諗住唔認數，分分鐘俾人告。
此外，首先要摸清當地物業市場走勢，摸頂入市就一殼眼淚，仲要了解發展商可唔可靠。另外，就係要計算下自己嘅資金，響香港買樓，搭車去睇樓只不過要使十元八塊，但層樓響外地，就可能多咗好多額外嘅交通、繙譯等雜費，福布斯建議，最好要預樓價嘅10至15%嚟畀額外使費，而滙價更要留心，差價分分鐘夠畀多份首期。
最後就係要留意兩地文化差異，印度人頭擰擰其實係代表「好」嘅意思，到時如果以為交易告吹，咁就大件事。買樓唔同買棵菜，大家要醒目啲喇！
電郵地址：[email protected]