港島西區樓價可謂天堂與地獄共存，由2000蚊到6000蚊呎都有，樓齡愈舊當然愈平，美聯馬鴻德話，即使去到堅尼地城尾嘅三四十年洋樓，點都值番2000蚊呎，而好似高街或者第一、二、三街，掹車邊都叫半山，即使洋樓仔都要2000幾3000蚊呎。不過，馬經理話，剛啱佢哋分行做咗單低價成交，該廈9年樓，呎價2000蚊都唔到，真係平得交關。
幢樓叫康裕苑，喺水街，單位一律670呎，實用率低過六成，內櫳唔夠400呎，2房1廳，迷你版廚廁，係當年趕住樓市瘋癲期不知名發展商搶錢之作，樓花價三四千蚊呎。好似啱啱賣出嘅中層F室，當年買入價240.5萬元，近3600蚊呎，聽講原業主當年曾經放過盤，開價320萬，有人出價到300萬都唔賣，自住至今，只賣得133萬，蝕107.5萬，由本來賺25%變成唔見咗45%樓價。
康裕苑隔籬就係區內樓王廣豐臺，超高嘅實用率，加埋區內個「朵」夠響，閒閒哋都要4000蚊呎，只係比泓都略平。天堂同地獄，原來距離可以咁近。