港股創新高後無以為繼，連續調整兩日後，噚日終於急挫，跌勢最驚嚇之時，恒指曾大跌268點。上海市肅貪，高官免職，大戶「借啲意」又製造一次市場恐慌。
恒指收市17308，下跌237點，H指大跌133點，7000大關失守，前日已轉弱嘅內地保險股同房產股，繼續被拋售。市場再傳國壽（2628）配股，另外一家大地產公司亦可能會伸手。
光大國際（257）真係有料，一度搶上0.91元，午後市勢急挫，但「拜也」好有力，頂得住，收0.88元，逆市而升2仙，成交大增，個勢仲有得去。
另一隻走勢又處於突破邊緣嘅係永成國際（850），收0.63元，亦係逆流而上，進賬5仙，今次突破0.60元的上升三角形阻力，照度上去，短線可見0.80元，跌穿0.58元止蝕。
永成本業生產漆油，最近有新諗頭，就係進軍石油開採業務，已同賣家訂立諒解備忘錄，收購東北石油（中國）不少於51%。永成「晒士」細（市值約4.4億元），但採油業則係大型工業，永成今次如成功轉型，股價起飛嘅動力，不容小覷。
已為轉型作好準備
永成剛剛做完「披成」，6700萬股作價0.50元，集資淨額約3300萬元，表示會用於收購東北石油。其實，永成近年已做過幾次集資，分別係05年8月配售8200萬股（作價0.125元）、06年2月配售6000萬股（0.165元）、06年6月配售8600萬股（0.285元）；4次集資合共7700萬元，明眼人一睇，就知道係為轉型而作嘅部署，收購採油業務成事機會應好大。
永成大股東及有關人等現時持股約35.7%，收購東北石油，相信會以現金加新股方式進行，新股發行多少？作價會比現價高幾多？都會引起市場憧憬，收購完成後，永成股價更有機會見1字頭，「晒士」亦會由小變大。
郭兆誠