呢幾個月大家嘅焦點都響晒8號仔度，真係睇嘅唔悶，寫嘅都想嘔，所以今日轉話題，講啲開心啲嘅嘢。就講吓8號仔嘅歡喜寃家王維基嗰檔城市電訊，因為佢哋11月24日晚搞搞新意思，掟20萬包場海洋公園，搞一年一度嘅員工大會，到時老王仲會響海洋劇場「發表講話」，真係夠晒噱頭！
初步反應熱烈
查實城電每年都會搞員工大會，一如好多大企業咁，例牌將全公司「士打乎」集中響啲禮堂之類，一齊坐定定聽老細吹水，講真，就算老王風趣極，都唔會係林九或詹瑞文嗰皮，於是成間公司千二人，一係就扮忙唔出席，一係就放蚊兼練習OB（outofbody即係坊間所謂的靈魂出竅）囉！唔係誇張，咪好似你細個返學上早會咁，話有留心聽校長講嘢個個都呃你啦！
為咗做到將老王嘅說話深入你心，城電嘅HR阿頭美美姐姐，於是諗出呢條好橋，畀老王響海洋劇場同大家回顧過去展望將來，下晝5:30講話1粒鐘之後，大家就可以dismiss，去山上機動城任玩到10:30，而為咗做到眾樂樂，COO楊主光更已下咗指令，裝機師傅嗰日唔好約order，街霸同埋幾間門市下畫4點就收檔落閘…於是乎，今年反應踴躍，報名人數係歷年之冠！唔知到時老王會唔會騎吓海豚咀下海獅助吓興咁呢？
不過換句話講，城電嗰日就好似東主有喜休業半日咁滯，唔知到時8號仔啲街霸會唔會趁火打劫，加多兩錢肉緊去搶客呢？
