前一日試完車影完相，真係成個人散晒咁滯，直頭係一上床唔使半分鐘已經瞓着，都好耐無試過囉！今日係德國慕尼黑試車之旅嘅最後一日，初頭仲諗住搭夜機可以瞓晏啲；哈，點知原來廠方又幫我哋安排好節目，先跟一班國內傳媒到市中心參觀，呢度有好多古舊建築物，其中一座教堂響鐘時仲會有公仔出嚟表演，引來好多遊客駐足欣賞，我哋當然都係其中一分子。欣賞完當地名勝之後，就坐旅遊巴士到市中心內一家中國餐廳吃午飯，雖然菜式唔係話好特別，但至少終於有番啖飯同熱湯落肚，好感動喔！
食完飯，一行人再到BMW位於慕尼黑嘅總部，可惜內裏機密嘢太多，所以唔可以影相同大家分享，但喺門外我哋卻見到新款MINI同Rolls-RoyceEX100喺度試緊車。最後，導遊帶我哋參加德國啤酒節；嘩，呢啲咪叫人山人海囉！喺呢個大過香港廸士尼嘅場地入面，所有攤檔又或者係機動遊戲都擠滿人，尤其係餐廳入面就更見人頭湧湧，大家都舉杯暢飲盡情狂歡，好熱鬧喎！
記者、攝影：鄭達基