我幾時都話，知道一個人睇乜嘢書，就知道佢係個乜嘢人！前日公司嚟咗個好似韓國偶像Rain咁款嘅高大型男新同事，點知經過佢枱面，竟然見到擺咗本好似黃頁咁厚、啡啡沉沉嘅書，書名係──《歷史學家》！
古板、嚴肅、沉悶、高深……呢啲字眼成為我對佢嘅即時評價。不過，型男喎，梗係要深入啲了解，放工經過旺角開益書店，即刻上樓捉住負責人顏小姐問：「呢本《歷史學家》咩來歷？」
點知佢話，《歷史學家》係中文版，原裝英文版叫《Historian》，喺英美好勁，作者係伊麗莎白．柯斯托娃，上年出書一周即時打冧《達文西密碼》。呢本書8月先出中譯本，9月返貨之前已經接定單接到手軟。
原來係講吸血鬼
嘩，咁勁！原來本書講吸血鬼Dracula（書譯卓九勒），仲係真有其人，故事基礎跟足真實東歐史，同《達》真係好似，集驚慄、懸疑、神秘、愛情、宗教及傳說於一身，銷情仲好過呢期我哋OL界勁hit嘅《穿Prada的惡魔》。顏小姐叫我有買趁手，我梗係唔執輸買番本。（原來睇呢本書嘅係至in型人先啱！^o^）