劉青雲節食變躁男

劉青雲節食變躁男

劉青雲昨日以一身鐵騎士打扮,與貝安琪在中環宣傳丹麥鞋履ecco,青雲更鬼馬地通場走。他透露為拍杜琪峯新片,已減去25磅,就快接近當年「fit佬」的磅數,他說:「我要不斷減肥,除咗勁做運動,仲要小心飲食,食多咗都會有罪惡感,好似做錯事咁。」

「天生肥仔」

青雲又直言脾氣都受影響,變得有點暴躁及敏感,他說:「嗰個角色都有少少精神問題,其實我天生係一個肥仔,好鍾意食嘢,食嘢係好開心嘅事。」提到現時藝人增肥減磅,多向纖體公司招手,收錢又方便,劉青雲說:「我就好難,其實我唔抗拒着泳褲影相,不過因為唔知幾時開戲,要減到、Keep到幾時?一開戲又忙,好難配合廣告宣傳。」
採訪、攝影:梁錦雯

減磅後的劉青雲極之風騷,出席鞋履宣傳活動時更摟抱多位女模特兒,認真艷福無邊。