噚日，孫柏文講過，呢個世界除咗有「惡性」通貨膨脹，都有良性高速通脹。只要通脹壓力係喺工資，而可以反映貨幣購買力嘅貨幣滙率穩定不變，「通脹」只係反映平均工人生產力有升。情況有如90年代初嘅香港，雖然當年我哋有每年雙位數字嘅通脹，不過因為工資升幅更加大，所以我哋可購買嘅進口貨品亦多好多。
咁如果要講一個經濟體系裏面，平均「工人生產力」呢樣嘢，除咗要睇班工人有幾「勁」（例如睇吓教育、技術水平等等），都要睇吓究竟個經濟體系嘅環境，可唔可以畀班工人發揮。如果個經濟體系嘅環境，係做又三十六，唔做又三十六，咁樣都好難搵到有工人肯「勁」。又或者個經濟體系，因政治因素被經濟制裁、甚至到要飽受禁運之苦，班工人唔可以專注做佢哋國際上最有競爭力嘅產品，班工人點會有機會全程發揮。
預期之內就唔怕亂
噚日，我又講過話，今時今日嘅伊拉克，雖然有70%通脹率，不過因為伊拉克貨幣對其他貨幣滙率非常穩定，大家可以推斷，伊拉克工人嘅工資正在飛升。工資大升嘅原因，應該係伊拉克營商環境有好轉。大家可能會問：「伊拉克𠵱家唔係七國咁亂咩？點解你會話佢哋嘅營商環境有好轉呢？」其實，政治環境毋須好轉，營商環境都可以好獨立咁變得更好，原因係，只要政治環境喺預期之內，只要「有幾亂」係喺預期之內，就會有千千萬萬個勤奮、「有貪念」嘅創業家從商。
所以，伊拉克人嘅工資喺度升嘅時候，應該係有輸出貨品去伊拉克嘅商機。噚日我應承過大家，同大家研究下賣乜畀伊拉克人好，所以今日就會同大家用個比較輕鬆嘅角度，去分析下出口貨品去伊拉克嘅商機。
首先，伊拉克人現時每日起居飲食、返工放工、返學放學，都要冒住槍林彈雨嘅環境來睇，佢哋嘅生活都應該好似「巴士阿叔」話齋「有壓力」。伊拉克又唔似我哋特區「名牌社區」天水圍咁，有龐大嘅社工團隊去做支援，所以可以相信，伊拉克人都會借用「精神科化學物品」可以帶來嘅紓緩去「逃避壓力」。呢啲「精神科化學物品」，應該喺伊拉克大有市場。
精神科化學物品有市場
當今世上，最多人用來「逃避壓力」嘅兩種「精神科化學物品」，就一定係乙醇同埋尼古丁。吸收乙醇最易嘅方法，就係去飲酒，不過，因為伊拉克人絕大部份都係回教徒，唔可以飲酒，乙醇呢個市場，應該會比較難發展，大家應該淨係考慮喺尼古丁市場發展。
當然，最常見吸收尼古丁嘅方法，就係食煙，不過做煙草商人唔係個個都得，所以，今日我就叫同大家發展尼古丁有關嘅市場。大家都知道，如果要食煙，首先就要點煙，所以大家可以考慮出口平價打火機去伊拉克。今日，我同一個喺城市大學讀書嘅朋友講呢個商機，佢話，呢個商機最大嘅隱憂，就係平價打火機，係所有製造商千篇一律嘅商品，如果要賣平價打火機去伊拉克，就一定要喺設計上幫啲打火機去增值addvalue。以下就係呢位城大同學嘅火機設計。