中六生Y仔喺上星期六到科技大學參加科大開放日，為後年升大學選科做準備。透過高考升大學，話難唔難，話易唔易，現在入學比率高，以學生Y嘅會考成績推論，有一定機會嘅，但要入到第一第二志願大學與學系，高考成績要好好至得。上星期六，七間大學公佈今年收生成績（港大未公佈），以環球商業學、醫學、計量金融學、會計等學系最難，譬如以中大收生成績計，環球商業4.7分（高考4A1B，會考5A3B），醫學4.52分、計量金融4.47分……中大以會考最佳七科成績計三分一（高考最好四科計三分二），包括中英文兩科在內。
學生Y睇見呢啲收生成績樣本，為之一窒。如果選七院校收生成績最低嘅學系，易好多啫，譬如中大電子工程、訊息工程，科大計算機科學、應用物理學、化學，城大電子物流，浸大物理與電腦，理大工程物理學等等。
睇吓啲收生成績分佈，就知道香港優秀學生選科以商科醫科為主，着眼點係搵工容易，Google最近嚟香港招聘學生，引起一陣旋風，只係好短暫嘅啫，數學物理好醒嘅學生唔會選番數理化生電子呢啲系，而會揀計量金融，現實可能會係好短視，但銀行界搶計量金融（QuantitativeFinance）畢業生，已出現泡沫現象，人工高到離晒譜，難怪中七生爭住入。
經紀S位太太同左丁山講：一位世姪今年畢業，主修計量金融，有六七間銀行請佢，其中兩三間嘅衍生工具部董事重親自打電話去世姪屋企游說，一間美資行畀人工連保證花紅（guaranteedbonus）去到一年八、九十萬元，比滙豐請trainee嘅年薪高出四倍，大學生一出嚟就有咁嘅年薪，歡喜到唔知點好，立即問阿爸借首期，甫出校門就買樓。航空H聽見S太咁樣講，嘆一聲：「以後邊度搵到工程師做建築、機械維修呀？人人都話金融好，香港獨沽一味，好牙煙啫！」航空H讀生物而成為航空界高層，認為做事要一步踏一步，唔好一步登天。美資ibank可以今年捧你上天，明年就裁人唔眨眼，細路因住至好。