對於胡溫怒炒「上海一哥」陳良宇，全國政協常委兼信德集團主席何鴻燊，噚晚出席航運界國慶晚會時回應話，彼此其實唔係好熟，「我識咗佢（陳良宇）好幾年，但都係見見面、揸吓手咁。佢當時都好落力喺上海（做事）嘅，不過發生呢啲嘢（涉嫌貪污撤職一事）真係好難講，問到呢啲政治嘢我真係唔識答。」
賭王補充，上海地產市道目前「相當好」，一切如常，不受影響。不過，華華睇番信德05年年報，燊哥上市業務嘅大本營都喺香港同澳門，計埋附屬、聯營同有份投資嘅嘢，佢喺內地亦只有廣州一幢寫字樓加商場項目，同上海地產應該冇乜關係，咁一係賭王喺上海有好多私人物業揸手，先會咁熟當地市道，亦咁淡定有錢剩啦。至於澳博上市，前日澳門娛樂股東會都通過咗，會喺香港搞間子公司，注入25%澳博股權，希望順順利利，年底可以上市喎。