呢鋪真係WinningEleven！香港足球代表隊早幾日出戰世界盃決賽周，結果俾英格蘭大炒11比1。八方唔係掛住打機或者發緊夢，而係講緊啱啱揭幕嘅「無家者世界盃」2006最新戰果。今屆賽事喺南非舉行，香港嘅曙光足球隊被編入死亡A組，對手有英格蘭、哈薩克，同埋塞爾維亞。
雖然香港隊嘅七位露宿者代表，連續幾個月接受有少年「廢」格遜之稱嘅社協幹事吳衛東地獄式訓練，但呢班深水埗林伯特、楓樹街高治，始終唔及嚟自利物浦、紐卡素、曼城、倫敦等地方嘅天橋底朗尼，同坑渠邊謝四。再加上呢隊英格蘭國家隊喺暑假期間去曼聯主場接受特訓。香港隊喺人哋身上入到一球，都算係有交代啦。
比賽到9月30日先結束，全球48個地區有超過500個露宿者足球員參加，場波一日未完，曙光隊仲有希望嘅。
有興趣嘅球迷可以上呢個網址，留意吓最新戰果。 http://www.homelessworldcup.org