少有喺日本賣過百萬隻嘅運動大作《全民高爾夫》系列，製作班底再次添食，今次改玩同樣有唔少擁躉嘅網球運動；Q版角色加上超易上手，就算冇打機慧根嘅網球嬌娃一樣啱玩。今日就搵嚟一對經常相約Book場打波嘅好姊妹，喺PS2呢隻《全民網球》上一決雌雄，睇吓到底邊個能變身舒拉寶娃！
記者︰陸俊雄
攝影︰伍慶泉
Model︰Geneieve、Maggie
Maggie同Gen呢對孖公仔，勁愛網球呢種玩意，可惜每個人體育細胞多少確有分別，前者落場殺到嘭嘭聲，後者例牌應接不暇，最高紀錄係連輸20場！好朋友都勢係假，阿Gen就話︰「打親都輸好冇癮啫，我係都要贏番次！」於是記者安排咗場另類網球賽，要常勝將軍Maggie同佢打PS2隻《全民網球》。
呢個好明顯係讓賽，雖然隻Game易玩，但Maggie從未玩過，結果俾操咗成晚嘅Gen不停扣殺，打到落花流水！可算一解阿Gen心裏多年屈辱，賽後仲大喊︰「爽晒！」Maggie雖終嘗一敗，但見好姊妹咁開懷，冇計啦。
識走位做高手
《全民網球》真係超易上手，起初就算齋按平抽掣，點都唔會俾人直落4:0掃走。摸多兩場後，你會發現記熟平抽、切球、挑高波三個掣已夠玩。不過殺波時機唔係時時出現，事關比賽過程中，球場地面會出現紅色圈或黃色圈，你要走位到黃圈上先可殺波。至於黃圈九成唔會離你好遠，你實走到，所以只要熟習走位，殺波直接得分，同樣得心應手。
除地面出現指導性嘅圈圈，喺每次揮拍時同樣有符號出現，教埋你揮拍Timing。彈出嚟嘅符號效果都幾過癮；打得準出音符，打得慢出烏龜，打快咗係兔仔。連呢啲細微位都咁趣致，女仔肯定玩得更投入。
升級制有排玩
遊戲初頭的確好易玩，但當你打到Level5左右就會發現，電腦奸到唔係人咁品，要你前後場走餐死，慢波引你上網之後再快球打遠場，奸到人都癲！玩開《全民高爾夫》嘅都知，故事模式每次升Level後，你會得到新球場、新角色，或換新裝，《全民網球》當然Keep住呢種傳統，場地有沙地又有草地，甚至有埋櫻花之丘公園、網球名校北高等11個場，可用角色更超過14名！而且每人都有四款以上造型，好似男主角唔穿上衫嘅沙灘Look都有，真係Item有排儲、Level有排升。
升Level贏到咁多獎品後，當然要同朋友分甘同味。喺對戰模式入面，你就可以同朋友用番贏返嚟嘅球場同新角色。而且對戰模式最多可四人齊玩，四個人用同一個角色、換上四套唔同球衣、喺櫻花場度大戰，諗起都過癮。再唔係嚟鋪男女混雙，同女朋友換套情侶裝挑戰電腦，幾Sweet呀！
PROFILE
遊戲類型：運動
對應機種：PS2
遊玩人數：1至4人
開發商：SCEI
行貨售價：$338
佛山讚先生：
雖然《全民高爾夫》好好玩，不過打高球始終較為個人化，只係同對手鬥快入洞。而呢隻《全民網球》就跟對手有更多互動，比賽起嚟更多變化，尤其四人同場較量更係熱鬧！
百彈賤腦男：
同一製作班底，《全民網球》就欠缺《全民高爾夫》嗰種變化多端嘅發球，好似骷髏頭開波、超級曲墜球等，而且Item亦唔夠豐富，都係等PS3隻《全民高爾夫5》算喇。
