今季有足主羅傑承大搞嘅本地甲組隊南華，除咗落力組軍外，亦善用𠵱家大熱嘅網上渠道，開咗個blog同廣大球迷嚟個正面溝通。我求大俠呢日上佢哋個blog，就見到佢哋啱啱安排咗幾位球員同贊助商拍廣告，當中包括為人熟識嘅「華人射手」歐偉倫、「半個娛人」文彼得、以及外形剛強、個樣有幾分似前南華外援奧拿里奧嘅大佬廸天奴！
南華blog有得睇
呢段題為「踏上球星路」、內容包括多幅3人拍攝廣告花絮相嘅網誌一出，我求大俠睇見球迷反應都唔錯，大部份都支持。好似「KDash」嘅回應，就話覺得好似外國嘅球星咁，有得拍廣告可提高知名度；「Samuel」亦認為羅生咁做，亦可以令球員增加自信心。
但最大迴響都係廸天奴呢位新外援，睇佢外形兇狠，都幾得球迷歡心，唔少回應都讚佢表現唔錯，仲有球迷認為南華即將進行嘅炒外援行動，應該冇廸天奴份嘞。
我求大俠睇睇下啲相，發覺廸天奴有啲角度，都同歐偉倫幾似樣，十足兄弟咁款；相信一年半載之前，就連廸天奴自己，可能好似「thomas」嘅回應：「我諗廸天奴發夢都冇諗過，佢有機會做廣告主角。」
「根據羅足主所講，呢輯只係平面廣告，我求大俠其實都好似部份球迷咁，希望整多輯電視廣告，等個樣充滿搞笑細胞嘅廸天奴，發揮一下。」