噚日講過SONY喺TGS前，宣布降低PS3預定售價，新價49,980日圓（約港幣$3,300）幾乎跟8年前嘅PS2售價相若，好多機迷叫好。不過首批PS3全球產量只得50萬部，跟原定06年目標嘅600萬部相去甚遠，變成奇貨可居，盞得個炒字！有網民就質疑SONY多此一舉，頭批貨點貴都一定有人買，降價只會益咗班水貨佬！查實筆者有另一睇法，明顯降價係稍緩任天堂Wii低價策略嘅計仔（Wii只賣千幾蚊港幣），SONY蝕多啲當畀大家做「冚口費」（有外國網站估計PS3成本高達港幣六千蚊），減低高不可攀嘅形象，並非為催谷少量貨源嘅低級招數。
查實降價最佳時機，起碼都要等到下年頭PS3生產上咗軌道、開始有大貨湧出市面時，再嚟招減價促銷先會奏效，衝擊肯定比「未賣已降價」實際得多。
記者：徐影龍