男女之間嘅關係，好多時都係一個願打一個願捱，外人好難明白，好似名模AnaR.同花花公子男友周立璟一齊咁多年，男友多次出外攬女鬼混，仲試過偷食斷正，搞到AnaR.為情暴肥暴瘦，但對愛情盲目嘅佢仍然要幫男友講說話，馮仁昭真係睇到都戥佢唔抵。
「不會控制他」
噚日又有雜誌踢爆周立璟偷食，原來佢早排同AnaR.去日本嗰陣，竟然喺夜晚偷會老公失蹤嘅靚太傅明憲，兩人仲拖手仔咀咗一輪。難為AnaR.噚日去中環為adler珠寶示範幾百萬首飾嗰陣，要獨力面對傳媒，雖然佢已經喺度死撐扮風騷，又踢腳又搖手，不過都掩蓋唔到一臉憔悴嘅樣。
AnaR.話識得傅明憲，不過唔算好熟，都唔覺對方同佢爭仔，佢話：「我想是goodbyekiss，這是一種禮貌，我小時候也會錫uncle，不過朋友就錫面，錫嘴就親密點。」對於男友多次偷食，AnaR.話：「我不想也不會控制他，雖然朋友都說我給了他太多自由，但我也沒法子，我不想24小時看住他。」唔知係咪因為呢單嘢，AnaR.噚日忽然話同男友未行到結婚呢一步，馮仁昭奉勸佢一句：揀老公都係搵個專一啲嘅好。
