深圳萬科集團董事長王石，鍾意搞房地產之餘，亦非常喜歡攀山越峯，佢舊年已經完成「7+2」創舉，闖過七大洲嘅峻嶺，又去埋南北兩極。至於今年，佢嘅新搞作本身亦都事先張揚咗，就係效法唐三藏，諗住揸架吉普車，跟玄奘路線，由西安出發去印度，玩足四十幾日左右。
不過，王石噚日南下香港，幫老友兼本地攀山專家鍾建民開嘅專門店剪綵時就話，𠵱家行程有變，嚟緊聽日、9月27號，就會去印尼走一趟，繼04年7月28日之後，再闖一次太平洋最高、有成5020米嘅查雅峯。今次大概會去半個月左右，返嚟先會去「取西經」喎！計落都啱嘅，因為老人家話過咗中秋節，秋風就應該起，到時王石雖然唔係騎白馬，但揸住架吉普車，經過火燄山、阿富汗都唔會咁熱辣辣啩。