咩叫開口夾着脷？煲呔應該最清楚。佢之前無啦啦喺回應記者提問時，講到香港由來已久嘅「積極不干預」政策已經冇咗，話政府𠵱家係用「大市場、小政府」原則，但佢冇法子可以自圓其說，講清楚兩項政策有乜分別？梗係俾人窮追猛打。
公民黨黨魁余大狀早前畀咗一次機會佢，叫佢清楚解釋，點知煲呔愈描愈黑，愈解愈矛盾，真係唔解好過解。一向執到正嘅余大狀又點會收貨，所以佢噚日再次去信煲呔，叫佢真係要清楚解釋兩項政策嘅具體內涵至好。余大狀仲向煲呔提供一個黃金機會，邀請佢出席本周日嘅論壇，同其他學者辯論一吓。不過特首辦噚日回覆時，無話煲呔去唔去喎，只話煲呔會覆信向余大狀交代。