歐冠盃今周中打第2輪分組賽，心水清嘅球迷都記得小弟第1輪推介安德列治和里爾，結果呢支褪色比利時球隊，真係主場都贏唔到。今日決定再追安德列治對家，捧AEK雅典贏波。文：牽牛
球隊強勢起上嚟，真係點都擋唔住，盤路可以遇神殺神咁厲害；好似英超嘅阿士東維拉，開咧聯賽5場可以全部贏盤，上周六足智彩開個罕有嘅半/一讓球盤，維拉都可以贏查爾頓2:0，成個上盤食晒，強到莊家開咩盤都照贏。
不過有啲球隊，弱起上嚟真係搵半個盤嚟贏都難；比甲喺足智彩冇開足，安德列治嘅盤路集中講歐冠盃，上仗主場對住作客唔多叻嘅里爾，莊家開平手盤高水，已經證明睇淡安德列治。表面上係里爾迫和1:1，不過有睇場波嘅球迷，會發覺被圍攻嘅竟然係安德列治，安軍亦只憑一次突擊領先一球，下半場里爾圍攻下終於扳平。安德列治主場尚且可以打成咁，一向作客都腳軟，今次點捧得過？
AEK主場威力驚人
AEK雅典上季壓倒同市勁敵彭拿典奈高斯攞聯賽亞軍，得以晉身今屆歐冠盃，絕對唔係僥倖，尤其是主場威力，踢15場贏12場和2場輸1場，真係唔講得笑。講真，AEK大名氣球員唔多，香港球迷較為熟識，就係前米杜士堡中場艾馬臣、踢過羅馬嘅希臘中堅達拉斯、同希臘04年歐國盃冠軍功臣之一拉基斯等，不過始終佢哋有希臘波特點，勝在中前場爛打，靠體力化壓迫對手。
而且希臘球隊踢歐洲賽，一向靠主場熱情球迷聲勢壓倒客軍，AEK雅典今屆將賽事主場移師到奧林匹克運動場上演，全場7萬人聲勢真係唔講得笑；歐冠盃外圍賽，AEK雅典就喺主場淨數赫斯3蛋，赫斯級數可能比安德列治更高，AEK使咩驚。
今場海外莊家開AEK雅典讓半球，以一支首仗就俾AC米蘭大數3蛋嘅球隊，都可以讓到咁辣，證明莊家已經對安德列治死心；一於順應安德列治弱勢，捧AEK雅典1.85倍單W。
博波爾多主和燕軍
有分頭推介，揀波爾多主場和燕豪芬；C組4支球隊實力甚為均勢，首輪已經出現兩場和波，波爾多作客迫和加拉塔沙雷，燕豪芬主場和利物浦。波爾多回師主場，理應有較佳表現；不過呢班兵攻力真係唔強，而且燕豪芬呢幾屆歐冠盃，都巧遇過里昂、摩納哥呢啲法國兵，累積唔少經驗。
C組形勢緊湊，輸波嗰隊打擊好大，預料雙方都極為謹慎，以唔輸為大前提，再和多場都唔奇，3.1倍偏熱和波賠率，已經有玄機啦！
投資特攻隊金句
希臘球隊踢歐洲賽，一向靠主場熱情球迷聲勢，壓倒客軍，AEK雅典今屆將賽事主場移師到奧林匹克運動場上演，全場7萬人聲勢，真係唔講得笑。