睇戲有「甜蜜蜜」，睇波就有「甜麥麥」，講緊係TOM仔一姐湯美娟，同埋佢位昂藏至少6呎、風趣幽默嘅夫君阿麥生。呢一幕就響前日北京網球中心上演，「糖份指數」絕對唔比誠誠同旋旋響羅馬街頭個幕十指緊扣低！
孖T姐年初接棒雲南特產兟哥仔做CEO，今年自然係由佢帶隊，睇一年一度嘅ChinaOpen，唔單止咁，佢仲帶埋響今年5月成功將佢自己私有化嘅麥生畀大家認識！
麥生話：得閒冇乜嘢做
麥生話，因為自己得閒冇乜嘢做，所以成日跟埋麥太出差，順便睇實佢，而娶到孖T姐呢個年薪過千萬又能幹又獨立嘅女人，麥生當住大家面前話今生無憾。
一路睇波，麥生就一路一手捉住麥太隻手，一手為麥太撥扇，仲唔介意擺埋post，畀大家影相交差，一時又負責埋講波畀大家聽，勁受大家歡迎……華華只係諗到呢句英文諺語：女人最好嘅珠寶首飾，就係佢身邊嘅男人！
查實係：幾間公司非執董
咁阿麥生係咪真係一個閒人咁簡單呢？查實係麥氏夫婦謙啦！麥生其實係孖T姐安達信時代嘅同事，仲係幾間上市公司嘅非執董，強項係搞吓IPO同合併……唔知孖T姐仲有冇呢啲「閒人」，可以介紹畀香港啲姊妹呢？
咁呢對精英夫婦，會唔會製造「小麥」？鎖你，孖T姐話，冇呢個計劃……真係有啲可惜呀呵！