如果大家好似孫柏文咁對歷史有少少興趣，特別睇過下政權被推翻嘅過程，好多時候都會見到，一個政權下台之前嘅一刻，該國嘅人民都好多時會遭受高速通脹嘅折磨。例如有漫畫「三毛流浪記」曾經描述過被共產黨「解放」之前嘅祖國，喺1948、1949年間陷入高速通貨膨脹嘅情況。或者，直接或間接令到希特勒納粹黨上台，喺1923至1924年嘅德國見過，而每49小時購買力跌一半嘅高速通脹。
末代政府狂印銀紙
近代當然有好多其他例子，我相信都唔需要為大家重複再講。不過，我都想好快咁講吓，點解咁多「末代政權」會出現高速通脹呢個現象。首先，高速通脹出現嘅其中一個方法，就係一個政府將印銀紙嘅印刷機開到盡。簡單講，如果一個國家有100件貨品，而經濟體系裏面有嘅100元，平均每件貨品嘅價就係1元，不過，個政府印多100元，經濟體系就會總共有200元，如果貨品數目不變，平均每件貨品嘅價就係2元，代表100%嘅通脹率。
大家可能會問：「點解個末代政府要印咁多銀紙？」理由其實好簡單，一個國家經歷高速通脹嘅時候，好多時候係代表該國嘅政府，已經差唔多完全耗盡所有管治手段。正當國家失控嘅時候，一個政府多數都要養住一大班軍人去維持控制，而呢班軍人就要出糧，咁話到明「國家失控」，政府就係肯定無法抽稅，所以唯一出糧畀軍人嘅方法，就係印銀紙。呢種高速通脹就叫「惡性」通貨膨脹。
伊拉克政府即將下台？
今時今日，其實係有一個國家，面對緊高達每年70%嘅通脹率，呢個國家就係花旗國「殖民地」伊拉克。大家可能會問：「咁講，係唔係等如花旗國支撐嘅伊拉克政府，即將會面臨下台？」如果唔講，差唔多日日都發生嘅爆炸事件，表面上70%嘅通脹率，真係代表伊拉克失控。不過，孫柏文相信，如果你問我哋特區金融管理局總裁任志剛先生，佢應該會話：「伊拉克70%嘅通脹率，係件好事！」
大家可能會問：「以任總嘅聰明才智，冇理由會話高速通脹率『係件好事』？」其實係會，我記得1994年我仲係一個預科生嘅時候，因為要做一個會計分嘅化學實驗，所以冇機會陪同其他讀經濟學嘅同學，去參觀金管局。原來嗰次參觀，金管局為我啲同學上咗次關於貨幣政策嘅課。嗰次嘅講座，連任總都有出席、發言。嗰陣墨西哥啱啱解決咗佢哋嘅貨幣危機，而香港又啱啱經過90年代初，每年雙位數字嘅通脹，所以每一個聽完講座嘅同學，返到學校都同我講，佢哋都喺任總身上學到好多嘢。
伊拉克通脹率係70%
當然，我即刻問：「任總覺得香港出現每年雙位數字嘅通脹冇問題？」我啲同學答：「任總話，只要貨幣嘅滙率係穩定，等於進口貨品嘅價錢都應該相當穩定，而高通脹嘅出現，只不過代表比較難進口、勞工值比較高服務嘅價錢提高咗。不過提高嘅原因只係反映香港人嘅生產力，代表香港人嘅薪金普遍上升，速度仲要快過通脹數字，而可購買嘅進口貨品亦多好多。呢種高速通脹，就叫良性高速通脹。」
如果大家睇下伊拉克，雖然有70%嘅通脹率，不過伊拉克貨幣滙率就係穩定，由舊年今日到現在，都係大約1500dinar對一美元。所以，有工做伊拉克人嘅薪金應該有升，佢哋對進口貨品嘅購買力，都應該大幅提升。
所以，呢個世界除咗有「惡性」通貨膨脹，都有良性高速通脹！聽日同大家講賣乜畀伊拉克人好。