周杰倫（Jay）同蔡依林（Jolin）分咗手之後，為免尷尬，已經甚少同台演出，對上嗰次應該係年初喺台北舉行嘅「2006HITO流行音樂獎」頒獎禮。不過因為佢哋同時都係百事可樂嘅代言人，當然難免有碰頭機會。
力邀Sammi出山
喺11月7日，呢個品牌將會同中央電視台合作，喺北京人民大會堂舉行25周年愛心演唱會，到時雙J又會同場演唱。佢哋嘅經理人都擔心到時傳媒又會有排寫，所以已經事先同百事講明，希望最好唔使Jay同Jolin同台合唱，免得尷尬。
除咗呢對過氣情侶外，其他表演嘉賓仲有韓國小天王Rain、古天樂、謝霆鋒、陳冠希同組合F4等，至於曾經做過百事代言人嘅鄭秀文（Sammi）同郭富城，百事都想請佢哋嚟做特別嘉賓，不過Sammi𠵱家深居簡出，睇怕都唔易請到佢出山做嘢。
