江蘇寧滬高速（177）今年4月頭由5.55元急跌至6月中最低3.90元，反彈止步於4.60元，由7月到𠵱家，一直喺4.28至4.65元之間橫行，表現落後於同業，難怪有散戶想博反彈。隻股噚日收4.52元，冇升跌。
喺「Yahoo討論區」內，缸邊好友問：「177咩價位入得過呢？我想買公路股，但係見995（安徽皖通）同576（滬杭甬）近排已經升咗好多，反而177好似郁得慢啲，大家覺得177要幾耐先去到5蚊呢？」chihong_kan回應：「請看它的財務報表，負債高到70%佔股東權益，資產回報得5%左右，難有作為。落後總有原因。」
睇技術走勢，寧滬牛皮咗接近3個月，MACD喺0線之上橫行，但未見有突破迹象，如博短線反彈，先要升破4.65元橫行通道頂至有得傾，上望5蚊左右，跌穿4.38元止蝕，值博率一般。
睇基本因素，寧滬股東資金130.48億元人民幣，淨借貸88.22億元人民幣，借貸比率高達67.6%，預測PE19.2倍，P/B1.75倍，相對同業為高，長線投資要諗諗。
余文