公平稅制聯盟上星期日喺全港擺檔募捐，希望市民一人捐十蚊，聯手登廣告反對銷售稅。據知聯盟暫時收到二萬幾蚊（未計喺堂區收到嘅善款），成績算係咁，聯盟呢個禮拜會繼續擺檔，大家真係多多益善，小小無拘。
雖然坊間反銷售稅聲音都幾明顯，但政府懶理你哋咁多，繼續做推銷工作。唐英年噚日就同馬時亨兵分兩路去游說。唐唐最大膽，明知工聯會極端反對銷售稅，都夠膽深入虎穴同佢哋舉行座談會，勇氣可嘉，真係英勇勳章都有得佢攞。與會者之一嘅王國興話唐唐都係炒冷飯，無新意，但基於佢肯主動出席，都大讚verygood。
馬仔亨就easy啲，去總商會舉辦嘅銷售稅論壇，佢話其他國家推銷售稅時都有好多反對聲音，所以對香港有人呱呱嘈都唔詫異，又撐芸芸新稅種中，銷售稅對本港長遠最有利，真係盡忠職守，唔連任都冇天理。
原來當局至今一共收到過千份有關銷售稅嘅意見，但馬仔亨無透露當中支持抑或反對多，答案係咪已經呼之欲出？